Gudrun Olafsdottir

Sönghátíð í Hafnarborg 2020 býður upp á söngnámskeið með mezzósópransöngkonunni og söngkennaranum Guðrúnu Jóhönnu Ólafsdóttur fyrir söngnemendur á grunn- og miðstigi. Farið verður í ýmislegt varðandi söngtækni, svo sem líkamsstöðu, öndun, stuðning, sérhljóðamyndun, að syngja hreint, hátt og lágt, veikt og sterkt. Einnig verður farið í túlkun og sviðsframkomu. Markmið námskeiðsins er að nemendur nái að njóta þess að syngja af enn meira frelsi og með dýpri tjáningu en áður. Nemendur skulu undirbúa tvö einsöngslög sem þeir geta sungið eftir minni og unnið í fyrir framan aðra nemendur á námskeiðinu.

Námskeiðið fer fram í Hafnarborg í Hafnarfirði þriðjudaginn 30.6. og miðvikudaginn 1.7.2020 kl. 17:00-19:00.

Námskeiðsgjald (2x2 klst.) er 9.900 kr.. Athugið að fjöldi þátttakenda er takmarkaður.

Skráning fer fram í gegnum netfangið

info@songhatid.com 

Vinsamlegast látið eftirfarandi upplýsingar koma fram í umsókninni:

Nafn:

Kennitala:

Símanúmer:

Netfang:

Söngmenntun eða söngreynsla:

Nánari upplýsingar í gegnum netfangið info@songhatid.com

Um leiðbeinanda námskeiðsins og listrænan stjórnanda Sönghátíðar í Hafnarborg:

Guðrún Jóhanna Ólafsdóttir mezzósópran hefur komið fram á tónleikum vítt og breitt um Evrópu, í Suður-Ameríku, Bandaríkjunum og Afríku í tónleikasölum svo sem Henry le Boeuf Hall í Bozar í Brussel, Auditorio Nacional de Música og Teatro Real í Madrid, Glinka sal Fílharmóníunnar og Belozelsky-Belozersky höllinni í St. Pétursborg, Coliseo í Buenos Aires og Royal Festival Hall í London. Hún hefur sungið m. a. með Sinfóníuhljómsveitum Íslands, Madrídar, Barselóna, Katalóníu, Útvarps- og Sjónvarpshljómsveit Spánar, La Mancha og Albacete, Camerata del Prado, St Petersburg State Symphony Orchestra og Philharmonia Orchestra í London. Hún kemur reglulega fram með Sonor Ensemble, en í þeirri sveit leika hljóðfæraleikarar úr Sinfóníuhljómsveit Spánar, undir stjórn Luis Aguirre. Guðrún er hluti af Duo Atlantica með gítarleikaranum Francisco Javier Jáuregui og Trio Aglaia með Javier og Elenu Jáuregui fiðluleikara.

Guðrún hefur sungið í óperum á Spáni, Bretlandi og Íslandi, hlutverk eins og Öskubusku, Dorabellu, Rosinu, Romeo, Prins Orlowsky, Sesto, Komponist, Dido, Ingibjörgu í Ragnheiði eftir Gunnar Þórðarson og titilhlutverkið í Stígvélaða kettinum eftir Montsalvatge í Konunglega óperuhúsinu í Madríd. Guðrún hefur frumflutt fjölda tónverka eftir íslensk og erlend tónskáld, sem mörg hver hafa verið samin sérstaklega fyrir hana. Hún hefur hlotið ýmis verðlaun í alþjóðlegum söngkeppnum, svo sem Kathleen Ferrier ljóðasöngsverðlaunin í Wigmore Hall í London, The Miriam Licette Scholarship í Konunglega óperuhúsinu Covent Garden, The Schubert Lieder Prize í Guildhall, Madeline Finden Memorial Trust Award í Royal Academy of Music, þriðju verðlaun í Concorso Vocale Internazionale di Musica Sacra í Róm, ljóðasöngsverðlaunin í hinni Alþjóðlegu söngkeppni Zamoraborgar á Spáni og verðlaun sem Besti flytjandi tónlistar eftir Rodrigo í Joaquín Rodrigo keppninni í Madríd. Meðfram því að koma fram hefur Guðrún kennt söng við Saint Louis University Madrid Campus síðastliðin 10 ár. Hún hefur einnig raddþjálfað kóra, haldið fyrirlestra um söng og tónlist og kennt raddtækni, túlkun og söng á spænsku á fjölda námskeiða, t.d. við Listaháskólann, Söngskólann í Reykjavík og Söngskóla Sigurðar Demetz.

Guðrún stundaði söngnám hjá Rut Magnússon í Tónlistarskólanum í Reykjavík og hjá prófessor Lauru Sarti í Guildhall School of Music and Drama í London, en þar hlaut hún meistaragráðu í söng og lauk óperudeild skólans. Guðrún var listrænn stjórnandi Kammertónleika á Kirkjubæjarklaustri í ellefu ár þar til hún stofnaði Sönghátíð í Hafnarborg, sem hún stjórnar. Söngur hennar hefur verið hljóðritaður á vegum Ríkisútvarpsins, Sjónvarpsins, BBC Radio 3, Spænska ríkisútvarpsins og Spænska ríkissjónvarpsins og var hún einn af söngvurunum sem Sjónvarpið fjallaði um í þáttaröðinni Átta raddir. Guðrún hefur sungið inn á geisladiskana Grieg-Schumann með Víkingi Heiðari Ólafssyni, Apocrypha (sem hlaut Íslensku tónlistarverðlaunin) með Nordic Affect, Iepo Oneipo Heilagur Draumur (Editor´s Choice, Gramophone Magazine) og Kom skapari með Kammerkór Suðurlands, Barn er oss fætt með Sinfóníuhljómsveit Íslands, Sigvaldi Kaldalóns: Ég lít í anda liðna tíð með Jónasi Ingimundarsyni, Tengsl Hjálmar H. Ragnarsson með Kammersveit Reykjavíkur, Mitt er þitt – íslensk og spænsk sönglög, English and Scottish Romantic Songs for Voice and Guitar (EMEC Discos) og Secretos quiero descubrir með Trio Aglaia, Awake með Sonor Ensemble og Grannmetislög og Áskell Másson (Naxos) með Caput. www.gudrunolafsdottir.com